చిరు అభిమాన బలమూ తాకట్టుకేనా?

అదే సమయంలో తనకు బలం చాలా ఉందని చూపేందుకు పవన్ కొన్ని ప్రయత్నాలు చేస్తున్నారు. గతంలో ఎన్నడూ చిరంజీవి అభిమానులను కలుపుకుపోయేందుకు పెద్దగా ఆయన ప్రయత్నించలేదు. రాజకీయం ఎవరిదారి వారిదే అని గతంలో పవన్ మాట్లాడారు కూడా. ఇప్పుడు మాత్రం అన్ని జిల్లాల్లోని చిరంజీవి అభిమానులతో జనసేన పెద్దలు సమావేశం అవుతున్నారు. జనసేనకు మద్దతు ఇవ్వని వారు అసలు మెగా ఫ్యాన్సే కాదని రెండురోజుల క్రితం నాగబాబు బ్లాక్‌మెయిల్ తరహాలో మాట్లాడారు. ఆదివారం నాదెండ్ల మనోహర్‌ చిరంజీవి అభిమానులతో సమావేశం నిర్వహించి… జనసేన తరపున రాజకీయ పక్రియలో పాల్గొనాలని వారిని కోరారు.

ఈ ప్రయత్నాలన్నీ ఎందుకంటే.. తన బలం, తన అన్న అభిమానుల బలం, సామాజిక వర్గ బలం ఇవన్నీ చూపించి చంద్రబాబును వీలైనంత పిండడం కోసమేనన్న అభిప్రాయం వ్యక్తమవుతోంది. ఈఎత్తులను గమనించే కాబోలు టీడీపీ కూడా ప్రస్తుతానికి గట్టిగా మాట్లాడుతోంది. మొన్నటి ఎన్నికల్లో జనసేనకు డిపాజిట్లు వచ్చింది 16 చోట్ల మాత్రమేనన్న అంశాన్ని తెరపైకి తెస్తోంది. జనసేన కలిస్తే నాలుగు సీట్లు పెరుగుతాయి.. ఒకవేళ కలకపోయినా 120 కొట్టేస్తామని టీడీపీ నేతలు పైకి మాట్లాడుతున్నారు. కానీ చంద్రబాబుకు అసలు విషయం తెలుసు. ఓ 50 సీట్లు పొత్తుల్లో పోయినా… అన్ని పార్టీలను కలుపుకుని వెళ్తేనే జగన్‌ ధాటిని ఎదుర్కొగలను అన్న విషయం ఆయనకు తెలుసు. పవన్‌ కల్యాణ్ కాస్త ఎక్కువ డిమాండ్ చేయాలని ప్రయత్నించినా.. ఆఖరిలో ఏ విధంగా పవన్‌ను దారికి తెచ్చుకుని.. పొత్తు పొడిపించాలో చంద్రబాబుకు గతంలో ఉన్న అనుభవం పనికొస్తుంది.