వాస్తు నిపుణుడు చంద్రశేఖర్ గురూజీ హ‌త్య కేసులో కొత్త కోణం.. అందుకేనా చంపింది?

క‌ర్ణాట‌క‌లోని హుబ్బ‌ళిలో మంగ‌ళ‌వారం నాడు వాస్తు నిపుణుడు చంద్రశేఖర్ గురూజీ దారుణ హ‌త్య‌కు సంబంధించి ప‌లు ఆస‌క్తిక‌ర విష‌యాలు వెలుగులోకి వ‌చ్చాయి. ఆయ‌న శ‌రీరం నిండా 50 క‌త్తి పోట్లు ఉన్నాయ‌ని పోలీసులు చెప్పారు. ఈ కేసులో ఇద్ద‌రు వ్య‌క్తుల‌ను అరెస్టు చేశారు. వీరిలో గురూజీ వ‌ద్ద ప‌నిచేసి మానేసిన ఓ వ్య‌క్తి కాగా, మ‌రో మాజీ ఉద్యోగిని భ‌ర్త ఉన్నారు. ఆస్తికి సంబంధించిన వివాదాలే గురూజీ హ‌త్య‌కు కార‌ణమ‌ని పోలీసులు ప్రాథ‌మిక అంచ‌నాకు వ‌చ్చారు.

చంద్రశేఖర్ గురూజీ ఎవరు?

చంద్రశేఖర్ గురూజీ దేశంలోని అత్యంత ప్రజాదరణ పొందిన వాస్తు నిపుణులలో ఒకరు. అతను క‌ర్ణాట‌క‌లోని బాగల్‌కోట్ జిల్లాకు చెందినవాడు. కాంట్రాక్టర్‌గా కెరీర్ ప్రారంభించిన గురూజీ ముంబైలో ఉద్యోగం సంపాదించాడు. తరువాత అతను తన వాస్తు వ్యాపారాన్ని ప్రారంభించగా అది విజయవంతమైంది. తన కుటుంబంలోని ఓ చిన్నారి మరణానికి సంబంధించిన వేడుకకు హాజరయ్యేందుకు ఆయన హుబ్బ‌ళి నగరానికి వచ్చారు.

గురూజీని ఎందుకు చంపారు?

చంద్రశేఖర్ గురూజీ హత్య కేసులో ధార్వాడ జిల్లా కలఘటగి తాలూకాకు చెందిన మంజునాథ్ దుమ్మవాడ, మహంతేష్ షిరూర్‌లను పోలీసులు అరెస్ట్ చేశారు. మంజునాథ్ గతంలో గురూజీ ద‌గ్గ‌ర ఉద్యోగం చేశాడు. మహంతేష్ భార్య వనజాక్షి కూడా గతంలో చంద్ర‌శేఖ‌ర్ గురూజీ వ‌ద్ద‌ ఉద్యోగి. వీరిద్ద‌రూ గురూజీ హ‌త్య త‌ర్వాత మహారాష్ట్రకు పారిపోవడానికి ప్రయత్నిస్తున్నప్పుడు పోలీసులు అదుపులోకి తీసుకున్నారు.

వనజాక్షి పేరిట గురూజీ ఆస్తులు కొనుగోలు చేసినట్లు పోలీసు వర్గాలు తెలిపాయి. తన ఆస్తిని తిరిగి ఇవ్వాలని ఆయ‌న కోరాడు. ఆమె ఆస్తిని తిరిగి ఇవ్వడానికి ఇష్టపడలేదు. కానీ ఆస్తిని తిరిగి ఇవ్వాలంటూ గురూజీ ఒత్తిడి చేయడంతో ప్లాన్ ప్ర‌కారం ఈ హత్య చేశార‌ని పోలీసులు చెప్పారు. అయితే ఈ విష‌యం నిర్ధార‌ణ కావ‌ల్సి ఉంద‌ని, దీంతో పాటు ఇంకా ఇత‌ర కార‌ణాలు ఏమైనా ఉన్నాయా అనే కోణాల్లో కేసు దర్యాప్తు చేస్తున్నామ‌ని పోలీసులు తెలిపారు.