చోర్ బజార్ కోసం ఆకాష్ నే ఎందుకు తీసుకున్నారు?

ఆకాష్ పూరి హీరోగా నటిస్తున్న సినిమా చోర్ బజార్. ఈ సినిమాకు ఆకాష్ నే ఎందుకు తీసుకున్నారు? పారితోషికం తక్కువని తీసుకున్నారా? లేక ఆకాష్ అయితే మార్కెట్ బాగుంటుందని తీసుకున్నారా? ఇవేం కాదంటున్నాడు నిర్మాత రాజు. కథకు ఆకాశ్ సెట్ అయ్యాడు కాబట్టే తీసుకున్నామని చెబుతున్నాడు.

“ఆకాష్ ఈ కథకు పర్పెక్ట్ గా సరిపోయాడు. కథ విన్నాక ఆయనకు బాగా నచ్చి ఒప్పుకున్నాడు. ఈ కథకు రెండు మూడు సినిమాలు చేసిన హీరోనే సరిపోతాడు. ఈ సినిమాతో ఆకాష్ కు మంచి పేరొస్తుంది. హీరోయిన్ పాత్రను మూగగా ఎందుకు పెట్టామనేది సినిమాలో చూడండి. ఇప్పుడున్న సోషల్ మీడియాను ఉపయోగించుకుంటూ ఆ పాత్ర ద్వారా ఫన్ క్రియేట్ చేశాం.”

ఇలా ఆకాష్ ను ఎంపిక చేయడం వెనక కారణాల్ని బయటపెట్టాడు రాజు. ఈనెల 24న ఈ సినిమా థియేటర్లలోకి రాబోతోంది. ఆకాష్ కెరీర్ లోనే భారీ బడ్జెట్ చిత్రంగా ఇది రాబోతోంది. తాజా సమాచారం ప్రకారం, ఈ సినిమాకు 6 కోట్ల రూపాయల బడ్జెట్ అయిందంట. మరి ఇది ఏ మేరకు బ్రేక్ ఈవెన్ సాధిస్తుందో చూడాలి. ఈ సినిమా హిందీ డబ్బింగ్ రైట్స్ ను 3 కోట్ల రూపాయలకు అమ్మారంట. తెలుగు శాటిలైట్+డిజిటల్ డీల్స్ లాక్ అవ్వకుండానే సినిమా థియేటర్లలోకి వస్తోంది.