బేబమ్మ ఖాతాలో మరో మూవీ..!

ఉప్పెన సినిమాతో హీరోయిన్ గా తెలుగు తెరకు పరిచయమైంది కృతి శెట్టి. ఆ సినిమాలో బేబమ్మగా కృతి శెట్టి ఒదిగిపోయిన తీరు అందరినీ ఆకట్టుకుంది. ఆ సినిమా తర్వాత అందరూ ఆమెను బేబమ్మగానే గుర్తుంచుకున్నారు. తొలి సినిమానే బ్లాక్ బస్టర్ గా నిలవడంతో కృతి శెట్టికి అవకాశాలు కూడా వరుసగా క్యూ కట్టాయి. ఆ తర్వాత కృతి శెట్టి నటించిన శ్యామ్ సింగరాయ్, బంగార్రాజు సినిమాలు కూడా సూపర్ హిట్ అయ్యాయి.

ప్రస్తుతం కృతి శెట్టి ఇంద్రగంటి మోహన కృష్ణ, సుధీర్ బాబు కాంబినేషన్ లో తెరకెక్కుతున్న ‘ ఆ అమ్మాయి గురించి మీకు చెప్పాలి’ అనే సినిమాతో పాటు, నితిన్ హీరోగా రాజశేఖర్ రెడ్డి దర్శకత్వంలో రూపొందుతున్న మాచర్ల నియోజకవర్గం సినిమాలో కూడా హీరోయిన్ గా నటిస్తోంది. అలాగే తమిళ డైరెక్టర్ లింగుస్వామి దర్శకత్వంలో రామ్ హీరోగా తెలుగు, తమిళ భాషల్లో నిర్మిస్తున్న ది వారియర్ సినిమాలో కృతి శెట్టి హీరోయిన్ గా నటిస్తోంది.

ఒకవైపు తెలుగు లో బిజీగా ఉన్నప్పటికీ తమిళంలో కూడా వరుసగా అవకాశాలు అందుకుంటోంది కృతి శెట్టి. తమిళంలో విలక్షణ దర్శకుడిగా పేరు తెచ్చుకున్న బాలా – హీరో సూర్య కాంబినేషన్ లో తెరకెక్కుతున్న ఓ సినిమాలో హీరోయిన్ గా కృతి శెట్టికి అవకాశం వచ్చింది. ఈ సినిమా ఇంకా సెట్స్ పైకి వెళ్లకముందే బేబమ్మ కోలీవుడ్ లో మరో అవకాశాన్ని అందిపుచ్చుకుంది.

స్టార్ హీరో ధనుష్ -డైరెక్టర్ అరుణ్ మాధేశ్వరన్ కాంబినేషన్ లో రానున్న సినిమాలో కృతి శెట్టి హీరోయిన్ గా ఎంపికైంది. ఈ సినిమాలో హీరోయిన్ గా మొదట ప్రియాంక అరుళ్ మోహన్ ను ఎంపిక చేయగా, డేట్స్ అడ్జస్ట్ కాకపోవడంతో ఆమె ఈ సినిమా నుంచి తప్పుకొంది. ప్రియాంక స్థానంలో కృతి శెట్టి హీరోయిన్ గా ఎంపికయింది. బేబమ్మ తెలుగు, తమిళ భాషల్లో చేతి నిండా సినిమాలతో బిజీబిజీగా మారిపోయింది.

ALSO READ: శర్వాకి జోడిగా రాశీ ఖన్నా..!