షారుక్ న్యూ మూవీ రిలీజ్ డేట్ ఫిక్స్..!

బాలీవుడ్ బాద్ షా షారుక్ ఖాన్ కొన్నేళ్లుగా వరుస పరాజయాలతో డీలా పడిపోయాడు. 2013లో ఆయన హీరోగా నటించిన చెన్నై ఎక్స్ ప్రెస్ బాక్సాఫీస్ వద్ద మంచి విజయం సాధించింది. ఆ తర్వాత ఆయన నటించిన ఏ సినిమా ఆకట్టుకోలేదు. వరుసగా దివానీ, హ్యాపీ న్యూ ఇయర్, రాయిస్, జీరో అపజయం పాలయ్యాయి. 2018లో ఎన్నో అంచనాలతో విడుదలైన జీరో మూవీ డిజాస్టర్ కావడంతో మూడేళ్లపాటు మరే సినిమాను షారుక్ అంగీకరించలేదు. గత ఏడాది సిద్ధార్థ్ ఆనంద్ దర్శకత్వంలో పఠాన్ అనే సినిమాను షారుక్ ప్రారంభించారు. దాంతో పాటు తమిళ డైరెక్టర్ అట్లీ దర్శకత్వంలో షారుక్ ఓ సినిమా చేస్తున్నాడు.

తమిళ్ లో పక్కా మాస్ చిత్రాలు చేస్తాడని అట్లీకి పేరుంది. స్టార్ హీరో విజయ్ – అట్లీ కాంబీనేషన్ లో వచ్చిన తేరి, మెర్సల్ సినిమాలు భారీ హిట్ సాధించాయి. దీంతో అట్లీతో కలసి షారుక్ ఓ యాక్షన్ సినిమా చేస్తున్నాడు. కొన్ని నెలల కిందట ఈ సినిమా షూటింగ్ మొదలు కాగా.. తాజాగా ఈ సినిమా ఫస్ట్ లుక్ పోస్టర్ విడుదల చేయడంతో పాటు సినిమా టైటిల్ జవాన్ అని ఫిక్స్ చేసినట్లు ప్రకటించారు.

అలాగే ఈ సినిమాకు సంబంధించిన మరో అప్డేట్ ని మేకర్స్ ప్రకటించారు. 2023 జూన్ 2వ తేదీన ఈ చిత్రాన్ని విడుదల చేస్తున్నట్లు తెలిపారు. గౌరీ ఖాన్ నిర్మిస్తున్న జవాన్ సినిమా తెలుగు, తమిళ, కన్నడ, మలయాళ, హిందీ భాషల్లో ఒకేసారి విడుదల కానుంది. హిట్ కోసం కొన్నేళ్లుగా ఎదురుచూస్తున్న షారుక్ ఖాన్ కి కనీసం అట్లీ అయిన హిట్ ఇస్తాడేమో వేచి చూడాలి. షారుక్ ఖాన్ పఠాన్, జవాన్ సినిమాలతోపాటుగా రణ్ బీర్ కపూర్ హీరోగా భారీ బడ్జెట్ తో తెరకెక్కుతున్న బ్రహ్మాస్త్ర సినిమాలో అతిథి పాత్రలో మెరవనున్నారు.