ఇలయ దళపతి- సమంత కాంబినేషన్ లో మరో మూవీ..!

స్టార్ హీరోయిన్ సమంత ప్రస్తుతం వరుసగా సినిమాలు చేస్తోంది. ఆమె ఎక్కువగా ఫీమేల్ లీడ్ రోల్స్ లో నటించేందుకు ఆసక్తి చూపుతున్న సంగతి తెలిసిందే. ప్రస్తుతం ఆమె ప్రధాన పాత్రలో గుణశేఖర్ దర్శకత్వంలో శాకుంతలం, హరి, హరీష్ ల దర్శకత్వంలో యశోద అనే మరో సినిమాలో నటిస్తోంది. అలాగే విజయ్ దేవరకొండ తో కలిసి ఖుషి అనే ప్రేమకథా చిత్రంలో నటిస్తోంది. దీనికి శివ నిర్వాణ దర్శకత్వం వహిస్తున్నాడు.

తాజాగా సమంత మరో సినిమా చేసేందుకు అంగీకారం తెలిపింది. తమిళ అగ్ర హీరో విజయ్ సినిమాలో హీరోయిన్ గా సమంత ఎంపికైంది. ప్రస్తుతం వరుస విజయాలతో దూసుకెళ్తున్న లోకేష్ కనకరాజ్ దర్శకత్వంలో విజయ్ తన 67వ సినిమా చేస్తున్నాడు. ఇందులో విజయ్ సరసన సమంత నటించనుంది. తమిళనాట విజయ్ – సమంత ది హిట్ జోడీ. వీరిద్దరూ కలిసి ఇంతకుముందు తేరి, మెర్సల్, కత్తి చిత్రాల్లో నటించగా ఈ మూడు సినిమాలు బాక్సాఫీస్ వద్ద భారీ విజయాన్ని అందుకున్నాయి.

ఇప్పుడు నాలుగో సారి వీరిద్దరూ జత కట్టనున్నారు. విజయ్ గత సినిమా బీస్ట్ బాక్సాఫీస్ వద్ద పరాజయం పాలైంది. మరోవైపు డైరెక్టర్ లోకేష్ కనకరాజ్ ఖైదీ, మాస్టర్, విక్రమ్ సినిమాలతో వరుసగా మూడు హిట్లు అందుకున్నాడు. వీరిద్దరి కాంబినేషన్లో వచ్చిన మాస్టర్ మూవీ మంచి విజయాన్ని అందుకుంది. దీంతో ఈ కాంబినేషన్ లో మరో సారి హిట్ పక్కా అని విజయ్ ఫ్యాన్స్ ధీమా వ్యక్తం చేస్తున్నారు.