10 నిమిషాల్లో మద్యం డెలివరీ.. హైదరాబాద్ స్టార్టప్ కంపెనీ ప్రయోగం

ఆన్‌లైన్‌లో వస్తువుల కొనుగోలు, డెలివరీ ఇప్పుడు సర్వసాధారణమైంది. ఫుడ్, గ్రోసరీ, ల్యాబ్ టెస్టులు వంటివి ఇంటికే వచ్చేస్తున్నాయి. ఆన్‌లైన్ డెలివరీ కంపెనీలు పెరిగిపోవడంతో చాలా కంపెనీలు ఫాస్టెస్ట్ డెలివరీ అంటూ ముందుకు వస్తున్నాయి. ఈ క్రమంలో హైదరాబాద్‌కు చెందిన స్టార్టప్ కంపెనీ ఒకటి 10 నిమిషాల్లో మద్యం ఇంటికి డెలివరీ చేస్తామని చెప్తోంది.

ఆగండాగండి… అయితే ఈ సంస్థ సేవలు హైదరాబాద్‌లో మాత్రం కాదు. మద్యం డెలివరీకి బెంగాల్ ప్రభుత్వం అనుమతులు ఇస్తుండటంతో కోల్‌కతాలో తమ సేవలు అందుబాటులో ఉంటాయని పేర్కొన్నది. హైదరాబాద్‌కు చెందిన ఇన్నోవెంట్ టెక్నాలజీస్ ప్రైవేట్ లిమిటెడ్ అనే సంస్థ ‘బూజీ’ అనే పేరుతో కోల్‌కతాలో సేవలు ప్రారంభించింది. ఇప్పటికే కోల్‌కతాలో ఆన్‌లైన్ లిక్కర్ డెలివరీకి అనేక సంస్థలు ఉండటంతో వాటి నుంచి పోటీని తట్టుకోవడానికి ఇలాంటి సేవను ప్రకటించింది.

కస్టమర్ ఆర్డర్ చేసిన 10 నిమిషాల్లో మద్యాన్ని ఇంటికి చేరవేస్తామని,. ఇలాంటి సేవ అందిస్తున్న ఏకైక కంపెనీ తమదే అని ఇన్నోవెంట్ టెక్నాలజీస్ పేర్కొన్నది. తమ కంపెనీకి బెంగాల్ ఎక్సైజ్ శాఖ అనుమతులు కూడా ఉన్నాయని స్పష్టం చేసింది.