అన్ స్టాపబుల్ అంటున్న ఫ్లాప్ డైరక్టర్

డైమండ్ రత్నబాబు.. ఒకప్పుడు మంచి మాటల రచయిత. కథలు కూడా బాగానే రాశాడు. దర్శకుడిగా మారాలని ఎప్పుడైతే అనుకున్నాడో అప్పట్నుంచి అతడికి బ్యాడ్ డేస్ మొదలయ్యాయి. ముందుగా బుర్రకథ అనే సినిమా చేశాడు. అది డిజాస్టర్ అయింది. దర్శకుడిగా రెండో ప్రయత్నంగా సన్నాఫ్ ఇండియా చేశాడు. అది డిజాస్టర్లకే డిజాస్టర్ అనిపించుకుంది. అయితే ఈ దర్శకుడు మాత్రం తగ్గేదేలే అంటున్నాడు. ఈ సారి తను అన్ స్టాపబుల్ అంటున్నాడు.

డైమండ్ రత్నబాబు కొత్త సినిమా పేరు అన్ స్టాపబుల్. బిగ్ బాస్ బాద్షా, మచ్ఛా అని ప్రేక్షకులు అందరూ ప్రేమగా పిలిచే విజే సన్నీ ఈ సినిమాలో హీరో. ప్రేక్షకులను తనదైన శైలిలో నవ్విచే సప్తగిరి, ఇందులో మరో హీరో. ఇందులో అతడి పాత్ర పేరు జిలానీ రామ్ దాస్. ఈ అన్‌స్టాపబుల్‌ ఎంటర్టైన్మెంట్ లో పోసాని కృష్ణమురళి, పృద్వి, మణిచందన, షకలక శంకర్, చమ్మక్ చంద్ర, బిత్తిరి సత్తి కూడా నటిస్తున్నారు.

ఈ చిత్రం పూజా కార్యక్రమాలు హైదరాబాద్ లోని ప్రసాద్ ల్యాబ్ లో సినీ ప్రముఖుల మధ్య జరిగాయి. ప్రముఖ రచయిత వి.విజయేంద్రప్రసాద్, దర్శకుడు బి.గోపాల్, మంత్రి ఇంద్రకరణ్ రెడ్డి, హీరో తనీష్, నటుడు బిత్తిరి సత్తి తదితరులు పాల్గొన్నారు.

రచయిత విజయేంద్ర ప్రసాద్ హీరో వి.జె సన్నీ లపై చిత్రీకరించిన ముహూర్తపు సన్నివేశానికి క్లాప్ కొట్టారు. దర్శకుడు బి.గోపాల్ కెమెరా స్విచ్ఛాన్ చేశారు. త్వరలోనే రెగ్యులర్ షూటింగ్ మొదలుపెడతారు.