కాకినాడ పోలీసులు ఎదుట లొంగిపోయిన ఎమ్మెల్సీ అనంతబాబు?

తన మాజీ డ్రైవర్ సుబ్రహ్మణ్యం మృతి కేసులో ఎమ్మెల్సీ అనంతబాబు ప్రధాన నిందితుడిగా ఉన్న సంగతి తెలిసిందే. సుబ్రహ్మణ్యం డెడ్ బాడీని ఆసుపత్రి వద్దకు తీసుకొని వచ్చి వదిలి వెళ్లిన అనంతబాబు ఆ తర్వాత అటువైపు రాలేదు. ఒక పెళ్లిలో కనపడిన తర్వాత ఆయన జాడే లేకుండా పోయింది. శనివారం రాత్రే అనంతబాబును అరెస్టు చేస్తామని ఎస్పీ ప్రకటించారు. కానీ పోస్టుమార్టం ఆలస్యం కావడంతో అరెస్టు చేయలేకపోయినట్లు పోలీసులు చెప్పారు.

కాగా, అనంతబాబు ప్రస్తుతం కాకినాడ పోలీసుల అదుపులో ఉన్నట్లు తెలుస్తున్నది. పోలీసులు ఆయనను విచారిస్తున్నట్లు సమాచారం. ఈ రోజు సాయంత్రం మీడియా సమావేశం నిర్వహించి అనంతబాబు అరెస్టును ప్రకటించే అవకాశం ఉన్నది. అప్పుడు ఈ కేసుకు సంబంధించిన పూర్తి వివరాలు వెల్లడించనున్నారు.

ఇవాళ ఉదయం పోలీసులు కాకినాడలోని అనంతబాబు నివాసానికి వెళ్లారు. అక్కడ ఆయన భార్య, తల్లి తప్ప మరెవరూ లేరు. శుక్రవారం సాయంత్రమే అనంతబాబు తన గన్‌మెన్లను వదిలి ఎక్కడికో వెళ్లిపోయారు. తొలుత సుబ్రహ్మణ్యంది అనుమానాస్పద కేసుగా నమోదు చేసినా.. పోస్టుమార్టం అనంతరం హత్య కేసు నమోదు చేసి ఎమ్మెల్సీ అనంతబాబును ఏ1 ముద్దాయిగా చేర్చి ఎఫ్ఐఆర్‌ను సవరించారు.