తెలంగాణ ప్రజలకు కేసీఆర్​ గుడ్ న్యూస్​..!

మే 1 నుంచి దేశవ్యాప్తంగా 18 ఏళ్లు నిండిన వాళ్లకు వ్యాక్సినేషన్​ ఇవ్వబోతున్నట్టు కేంద్రం ప్రకటించిన విషయం తెలిసిందే. అయితే వ్యాక్సినేషన్​ ఫ్రీ కాదని.. డబ్బు వసూలు చేస్తామని కేంద్రం ప్రకటించింది. మరోవైపు వ్యాక్సిన్​ సంస్థలు సైతం ధరలను ప్రకటించాయి. దీంతో కేంద్ర ప్రభుత్వం ఉచితంగా వ్యాక్సినేషన్​ చేయాలన్న డిమాండ్​ ఊపందుకున్నది.

ప్రస్తుతం దేశవ్యాప్తంగా 45 ఏళ్లు పైబడిన వాళ్లకు ఉచితంగా వ్యాక్సిన్​ ఇస్తున్న విషయం తెలిసిందే. మిగిలిన వాళ్లకు కూడా ఉచితంగా వ్యాక్సిన్​ ఇస్తారని అంతా భావించారు. కానీ కేంద్రం మాత్రం 18 ఏళ్లు నిండిన వాళ్లకు 45 ఏళ్ల లోపు వాళ్లకు వ్యాక్సినేషన్​ టైంలో డబ్బు వసూలు చేస్తామని ప్రకటించింది. దీంతో పలు రాష్ట్ర ప్రభుత్వాలు ముందుకొచ్చి.. తమ రాష్ట్రంలో వ్యాక్సినేషన్​ కు అయ్యే ఖర్చును తామే భరిస్తామని ప్రకటించాయి.

ఉత్తర్​ప్రదేశ్​, కేరళ రాష్ట్రాలు ఈ మేరకు తొలుత ప్రకటన చేశాయి. ఆ తర్వాత ఆంధ్రప్రదేశ్​ ప్రభుత్వం సైతం ఉచితంగా వ్యాక్సిన్​ ఇవ్వబోతున్నట్టు ప్రటించింది. తాజాగా తెలంగాణ సీఎం కేసీఆర్​ సైతం ఈ మేరకు ఓ ప్రకటన చేశారు. తమ రాష్ట్రంలో ఉచితంగానే వ్యాక్సిన్​ అందిస్తామని ఆయన ప్రకటించారు. శనివారం తెలంగాణ ప్రభుత్వం ఈ మేరకు ఆదేశాలు జారీచేసింది. రాష్ట్రంలోని ప్రజలందరికీ ఉచితంగా వ్యాక్సిన్ ఇవ్వనున్నట్టు ప్రకటించింది.

దీని వల్ల ప్రభుత్వంపై రూ.2500 కోట్ల భారం పడనుంది. ఈ మేరకు సీఎం కేసీఆర్ సంబంధింత అధికారులకు ఆదేశాలు జారీ చేశారు. సీఎం కేసీఆర్ కరోనా బారి నుంచి పూర్తిగా కోలుకున్న అనంతరం ఉన్నత స్థాయి సమీక్ష సమావేశం నిర్వహించనున్నారు. నాటి నుంచే ఉచిత వ్యాక్సినేషన్ కార్యక్రమాన్ని సైతం స్వయంగా పర్యవేక్షించనున్నారు.