ఎంపీటీసీ, జడ్పీటీసీ ఎన్నికలు నిర్వహించలేం..!

ప్రస్తుత పరిస్థితుల్లో ఏపీలో ఎంపీటీసీ, జడ్పీటీసీ ఎన్నికలను నిర్వహించడం కుదరదని ఎన్నికల కమిషనర్​ నిమ్మగడ్డ రమేశ్​ తేల్చిచెప్పారు. ఈ నెల 31తో తన పదవీ కాలం ముగియబోతున్నదని.. ఆ లోపే ఎన్నికలు నిర్వహించడం సాధ్యం కాదని ఆయన పేర్కొన్నారు. కొత్తగా పదవీ బాధ్యతలు చేపట్టేవారు ఎన్నికల కోసం షెడ్యూల్​ విడుదల చేస్తారని పేర్కొన్నారు. ఎన్నికల సంఘానికి.. ఏపీ ప్రభుత్వానికి చాలా కాలంగా సఖ్యత లేదు. స్థానిక సంస్థల ఎన్నికలు పెట్టి తీరతానని ఎన్నికల కమిషనర్​.. వద్దని ప్రభుత్వం చెబుతూ వచ్చింది. అయితే చివరకు కోర్టుకెళ్లి నిమ్మగడ్డ తన పంతం నెగ్గించుకున్నారు.

అయితే ఆయన ఎన్నికల కమిషనర్​గా బాధ్యతలు చేపట్టాక ప్రభుత్వ పెద్దలకు నిమ్మగడ్డ మధ్య పచ్చగడ్డి వేస్తే భగ్గుమనేది. నిమ్మగడ్డ తన అధికారాలను విస్తృతంగా వినియోగించారు. ఏ ఎన్నికల కమిషనర్​ చేయని విధంగా జిల్లా యాత్రలు నిర్వహించారు. మంత్రులకు నోటీసులు ఇచ్చారు. కొన్ని ప్రభుత్వ పథకాలు కూడా ఆపేయాలంటూ ఆదేశాలు జారీచేశారు.

అయితే నిమ్మగడ్డ రమేశ్​ టీడీపీకి అనుకూలంగా పనిచేస్తున్నారని.. అధికార పార్టీ నేతలు ఆరోపించారు. ఈ క్ర‌మంలోనే ఎన్నికల ఫలితాలు వచ్చేశాయి. టీడీపీ ఈ ఎన్నికల్లో చావు దెబ్బ తిన్నది. కనీసం పోటీ కూడా ఇవ్వలేకపోయింది. ఇదే ఊపులో ఎంపీటీసీ, జడ్పీటీసీ ఎన్నికలు కూడా నిర్వహించాలని ప్రభుత్వం కోరుతున్నది.

గతంలో ఎంతో హడావుడిగా ఎన్నికల షెడ్యూల్​ విడుదల చేసిన నిమ్మగడ్డ ప్రస్తుతం తటపటాయిస్తున్నారు. టీడీపీకి మేలు చేకూర్చేందుకే ఆయన అలా ప్రవర్తిస్తున్నారన్న వాదనలు వినిపిస్తున్నాయి. ఇదిలా ఉంటే ఈ నెల 31తో ఆయన పదవీ కాలం ముగియబోతున్నది.
తాను ఎన్నికలు నిర్వహించే పరిస్థితి లేదని ఎన్నికల కమిషనర్​ స్పష్టం చేశారు. అంతేకాక.. గత ఎంపీటీసీ, జడ్పీటీసీ ఎన్నికల్లో ఏవైనా అవకతవకలు, అక్రమాలు జరిగిఉంటే ఫిర్యాదు చేసుకోవచ్చని కూడా ఆయన సూచించారు. పంచాయతీ, మున్సిపల్​ ఎన్నికలు ఎంతో ప్రశాంత వాతావరణంలో నిర్వహించామని ఆయన చెప్పుకొచ్చారు.

రాష్ట్ర ఎన్నికల సంఘం, కేంద్ర ఎన్నికల సంఘం అవలంభించిన మంచి పద్ధతులను అమలు చేయాల్సి ఉందని స్పష్టం చేశారు. రాష్ట్రంలో కూడా పోలింగ్ సిబ్బందికి వెంటనే వ్యాక్సినేషన్ ప్రక్రియ చేపట్టాలని ఆదేశించారు.