ప్రభాస్ ఫ్యాన్స్ ఎంత పని చేశారో చూడండి

సాధారణంగా మేకర్స్ టైటిల్ ప్రకటిస్తారు. అభిమానులు పండగ చేసుకుంటారు. కానీ ఇక్కడ సీన్స్ రివర్స్ అయింది. అభిమానులు టైటిల్ ప్రకటించారు. ఆశ్చర్యపోవడం మేకర్స్ వంతయింది. ప్రభాస్ సినిమాకు సంబంధించి ఈ విశేషం చోటుచేసుకుంది.

రాథాకృష్ణ కుమార్ దర్శకత్వంలో ఓ సినిమా చేస్తున్నాడు ప్రభాస్. మూవీని సెట్స్ పైకి తీసుకొచ్చి చాన్నాళ్లవుతుంది. ఇంకా చెప్పాలంటే దాదాపు ఏడాది గడుస్తోంది. ఇప్పటివరకు సినిమాకు టైటిల్ ఫిక్స్ చేయలేదు. దీనిపై సోషల్ మీడియాలో ప్రభాస్ ఫ్యాన్స్ ఎప్పటికప్పుడు గోల చేస్తూనే ఉన్నారు. కనీసం టైటిలైనా రిలీజ్ చేయండంటూ విన్నపాలు, వార్నింగులు ఇస్తూనే ఉన్నారు.

అయితే రెబల్ స్టార్ ఫ్యాన్స్ గోడును మేకర్స్ మాత్రం లైట్ తీసుకున్నారు. అలా సుదీర్ఘ నిరీక్షణ తర్వాత ఇక లాభం లేదని గ్రహించిన అభిమానులు తామే సినిమాకు టైటిల్ పెట్టేశారు. ప్రభాస్ సినిమాకు రాథేశ్యామ్ అనే టైటిల్ ఫిక్స్ చేసిన ఫ్యాన్స్.. ఆ పేరుతో సినిమాకు ప్రచారం చేయడం మొదలుపెట్టారు. ఎంతలా ప్రమోషన్ ఇస్తున్నారంటే.. రాథేశ్యామ్ అనే టైటిల్ ఏకంగా ట్రెండింగ్ లోకి వచ్చేసింది.

నిజానికి మేకర్స్ ఈ సినిమాను రిజిస్టర్ చేయించారు. రాథేశ్యామ్ అనే టైటిల్ తో పాటు ఓ డియర్ అనే పేరును కూడా రిజిస్టర్ చేయించారు. అయితే ఇప్పటికీ టైటిల్ ను అఫీషియల్ గా ప్రకటించకపోవడంతో.. అభిమానులే రాథేశ్యామ్ టైటిల్ ను సెలక్ట్ చేసి వైరల్ చేసి పడేశారు.