ఈసారి మహేష్ హీరోయిన్ ఎవరు?

మొన్నటికిమొన్న శ్రద్ధాకపూర్ పేరు తెరపైకి వచ్చింది. అంతకంటే ముందు కియరా అద్వానీ పేరు వినిపించింది. ఇప్పుడు కొత్తగా సారా అలీఖాన్ పేరు వినిపిస్తోంది. అవును.. ఈసారి మహేష్ కోసం బాలీవుడ్ భామను సెట్ చేసేందుకు గట్టిగా ట్రై చేస్తున్నారు మైత్రీ మూవీ మేకర్స్. ఎందుకంటే, మహేష్ మూవీని పాన్-ఇండియన్ సినిమాగా మార్చాలనేది వీళ్ల ప్లాన్.

మహేష్ ఎప్పుడూ తెలుగుపైనే ఫోకస్ పెట్టాడు. గతంలో తెలుగు-తమిళ భాషల్లో స్పైడర్ లాంటి సినిమా చేసినా ఫలితం తేడా కొట్టేసింది. దీంతో పూర్తిగా తెలుగులోనే సినిమాలు చేయాలని నిర్ణయించుకున్నాడు. అయితే పరశురామ్ దర్శకత్వంలో మహేష్ చేయబోయే సినిమాను మాత్రం కేవలం తెలుగుకే పరిమితం చేయాలని అనుకోవడం లేదు మైత్రీ మూవీ మేకర్స్ నిర్మాతలు. హిందీ, తెలుగు, తమిళ భాషల్లో సైమల్టేనియస్ గా షూట్ చేయాలనేది వీళ్ల ప్లాన్. అందుకే పాన్-ఇండియా అప్పీల్ కోసం బాలీవుడ్ హీరోయిన్ ను ట్రై చేస్తున్నారు.

ఓవైపు మేకర్స్ బాలీవుడ్ హీరోయిన్ కోసం ప్రయత్నిస్తున్నప్పటికీ.. మరోవైపు మహేష్ కు మాత్రం ఈ వ్యవహారాలు తెలియవని చెబుతున్నారు. సాధారణంగా హీరోయిన్ విషయంలో మహేష్ ఎప్పుడూ కలుగజేసుకోడు. ఈసారి కూడా అలానే వ్యవహరిస్తున్నాడు. అయితే తెలుగు, తమిళ, హిందీ భాషల్లో సినిమా తీయాలనే ప్రపోజల్ కు మాత్రం మహేష్ నో చెప్పినట్టు తెలుస్తోంది.

తెలుగులోనే సినిమా తీయాలని, కావాలంటే మిగతా భాషల్లోకి డబ్ చేసుకోవాలని సూచిస్తున్నాడు. అలా చేసినా కూడా హిందీ హీరోయిన్ ఉంటే బాలీవుడ్ లో మైలేజీ పెరుగుతుంది. దానికోసమే నిర్మాతల ప్రయత్నం. మరో నెల రోజుల్లో హీరోయిన్ ను లాక్ చేయాలనే టార్గెట్ తో వర్క్ చేస్తున్నారంతా.