ప్రభాస్ ఆన్ లైన్ స్టోరీ సిట్టింగ్స్

లాక్ డౌన్ టైమ్ లో టాలీవుడ్ మొత్తం స్తంభించిపోవడంతో హీరోహీరోయిన్లంతా ఎవరికి తోచిన పనుల్లో వాళ్లు బిజీ అయిపోయారు. అయితే పూరి జగన్నాధ్, రాజమౌళి, సుకుమార్ లాంటి కొద్దిమంది మాత్రం ఆన్ లైన్ లో తమ సినిమా పనులు పూర్తిచేస్తున్నారు. దీంతో పాటు కొత్తగా మరికొన్ని కథలు రాసుకుంటున్నారు. ఇప్పుడీ లిస్ట్ లోకి హీరో ప్రభాస్ కూడా చేరిపోయాడు.

కరోనా కారణంగా ప్రభాస్ హీరోగా నటిస్తున్న సినిమా షూటింగ్ ఆగిపోయింది. రాధాకృష్ణ కుమార్ దర్శకత్వంలో తెరకెక్కుతున్న ఈ సినిమా మళ్లీ ఎప్పుడు పట్టాలపైకి వస్తుందో తెలీదు. దీంతో ప్రభాస్ పూర్తిగా ఖాళీ అయిపోయాడు. ఇంటికే పరిమితమైపోయాడు. అయితే యంగ్ రెబల్ స్టార్ ఖాళీగా లేడు. ఆన్ లైన్ లో స్టోరీ డిస్కషన్స్ స్టార్ట్ చేశాడు.

నాగ్ అశ్విన్ దర్శకత్వంలో ఓ సైన్స్ ఫిక్షన్ సినిమాకు ప్రభాస్ గ్రీన్ సిగ్నల్ ఇచ్చిన సంగతి తెలిసిందే. ఈ సినిమాకు సంబంధించి దర్శకుడితో ఆన్ లైన్ లో ప్రతి రోజూ కథాచర్చలు సాగిస్తున్నాడు ప్రభాస్. వీళ్లిద్దరూ ప్రస్తుతం ఎంత బిజీగా ఉన్నారంటే, లాక్ డౌన్ ముగిసేలోపు వీళ్ల కాంబోలో రావాల్సిన సినిమా స్క్రీన్ ప్లే మొత్తం రెడీ అయినా ఆశ్చర్యపోనక్కర్లేదు.

ప్రస్తుతం చేస్తున్న సినిమా కంప్లీట్ అయిన వెంటనే గ్యాప్ ఇవ్వకుండా నాగ్ అశ్విన్ మూవీని సెట్స్ పైకి తీసుకురావాలనేది ప్రభాస్ టార్గెట్. ఎందుకంటే, సాహో తర్వాత ఇప్పటికే ప్రభాస్ కెరీర్ లో చాలా గ్యాప్ వచ్చేసింది. ఇప్పుడు కరోనాతో ఆ గ్యాప్ మరింత పెరిగిపోతోంది.