ఏపీ ఎంసెట్ ఫలితాలు వాయిదా వేసిన విద్యామండలి

ఏపీలో ఇంజనీరింగ్, వ్యవసాయ, ఫార్మసీ కళాశాలల్లో ప్రవేశాల కోసం నిర్వహించిన ఎంసెట్ పరీక్షా ఫలితాలను వాయిదా వేశారు. షెడ్యూల్ ప్రకారం ఈ నెల 18న ఎంసెట్ రిజల్ట్స్ విడుదల చేయాలి.. కానీ తెలంగాణ ఇంటర్ విద్యార్థుల కోసం వాయిదా వేశారు.

ఎంసెట్‌లో ఇంటర్ మార్కులకు కూడా వెయిటేజీ ఉంటుంది. అయితే తెలంగాణ ఇంటర్ ఫలితాల్లో గందరగోళం నెలకొన్నందువల్ల ఇంకా ఫలితాలు వెల్లడించలేదు. రీ-వెరిఫికేషన్, రీ-వాల్యుయేషన్ తర్వాత తెలంగాణ ఇంటర్ ఫలితాలు వెలువడటానికి సమయం పడుతుంది. దీంతో ఆ ఫలితాలు వెలువడిన తర్వాతే ఏపీ ఎంసెట్ ఫలితాలు వెల్లడించాలని ఏపీ ఉన్నత విద్యా మండలి ప్రకటించింది.

కాగా, ఎంసెట్ పరీక్షకు 1,85,711 మంది ఇంజనీరింగ్, 81,916 మంది వ్యవసాయ, వైద్య విద్య పరీక్షలకు హాజరయ్యారు. వీరంతా ఫలితాల కోసం ఎదురు చూస్తున్నారు.