నటి అపూర్వకు టీడీపీ ఎమ్మెల్యే అనుచరుల వేధింపులు.... కారణం అదే....

సినీ నటి అపూర్వ పోలీసులను ఆశ్రయించారు. ఆమె టీడీపీ ఎమ్మెల్యే అనుచరుల నుంచి వేధింపులు ఎదుర్కొంటున్నారు. ఈ నేపథ్యంలో ఆమె పోలీసులకు ఫిర్యాదు చేశారు.

ఇటీవల ఒక ఇంటర్వ్యూలో ఆమె టీడీపీ ఎమ్మెల్యే చింతమనేనిపై కొన్ని ఘాటు వ్యాఖ్యలు చేశారు. చింతమనేని రౌడీయిజం మితిమీరి పోయిందని వ్యాఖ్యానించారు. చింతమనేని తమ బంధువులకు అక్కడ నరకం చూపిస్తున్నారని ఆమె ఆరోపించారు.

మరోసారి ఏపీలో టీడీపీ గెలిస్తే…. ఏపీలో తాము ఆస్తులు అమ్ముకుని తెలంగాణలో సెటిల్ అయిపోతామని కూడా చెప్పారు. చింతమనేని ఇష్టానుసారం మాట్లాడుతుంటే దాన్ని చంద్రబాబు ఎందుకు కంట్రోల్ చేయడం లేదో అర్థం కావడం లేదన్నారు.

ఈ నేపథ్యంలో కొద్దిరోజులుగా తనను చింతమనేని అనుచరులు వేధిస్తున్నారని ఆమె హైదరాబాద్ సైబర్ క్రైం పోలీసులకు ఫిర్యాదు చేశారు. సోషల్ మీడియా వేదికగా తనపై అసత్య ఆరోపణలు చేస్తూ… మానసికంగా వేధిస్తున్న చింతమనేని అనుచరులపై తక్షణం చర్యలు తీసుకోవాలని ఆమె పోలీసులను కోరారు.