మరో ప్రేమకథా చిత్రంలో శర్వానంద్

పూర్తి ప్రేమకథా చిత్రంగా తెరకెక్కింది పడి పడి లేచే మనసు సినిమా. ఈ వీకెండ్ ఎట్రాక్షన్ గా ఇది థియేటర్లలోకి రాబోతోంది. అయితే త్వరలోనే మరో ప్రేమకథలో కూడా నటించబోతున్నాడు ఈ హీరో. అది కూడా సూపర్ హిట్ అయిన ఓ తమిళ సినిమాకు రీమేక్ కావడం విశేషం

అవును.. కోలీవుడ్ లో సూపర్ హిట్ అయిన 96 అనే సినిమా తెలుగు రీమేక్ లో నటించబోతున్నాడు శర్వానంద్. ఈ విషయాన్ని అతడు అధికారికంగా ప్రకటించాడు. ఈ సినిమా రీమేక్ రైట్స్ ను ప్రముఖ నిర్మాత దిల్ రాజు దక్కించుకున్నాడు. అతడి బ్యానర్ లోనే శర్వానంద్ హీరోగా ఈ సినిమా రాబోతోంది.

గతంలో దిల్ రాజు బ్యానర్ పై శతమానం భవతి సినిమా చేశాడు శర్వానంద్. ఆ సినిమా పెద్ద హిట్ అయింది. ఇప్పుడు మరోసారి వీళ్లిద్దరి కాంబోలో ఈ రీమేక్ మూవీ వస్తోంది.

నిజానికి ఈ సినిమాలో నానిని హీరోగా అనుకున్నారు. ఆ తర్వాత బన్నీ పేరు కూడా వినిపించింది. ఫైనల్ గా ఈ రీమేక్ లో నటించే ఛాన్స్ శర్వానంద్ కు దక్కింది. త్వరలోనే ఇందులో నటించే హీరోయిన్ తో పాటు మిగతా టెక్నీషియన్స్ వివరాలు బయటకు వస్తాయి.