ఇదో ప్రయోగం... 2 వారాల గ్యాప్ లో 2 సినిమాలు

సాధారణంగా పెద్ద సినిమాల మధ్య కాస్త గ్యాప్ ఇవ్వాలని చూస్తారు. ఇక ఒకే బ్యానర్ కు చెందిన సినిమాలకైతే ఈ గ్యాప్ చాలా ఎక్కువగా ఉంటుంది. కనీసం నెల రోజులు గ్యాప్ ఇస్తారు. కానీ మైత్రీ మూవీ మేకర్స్ మాత్రం ఈ రూల్స్ ను చెరిపేస్తోంది. తమ సినిమాకు పోటీగా, తమ బ్యానర్ నుంచే ఇంకో సినిమాను విడుదలకు సిద్ధం చేస్తోంది.

మైత్రీ మూవీ మేకర్స్ బ్యానర్ పై తెరకెక్కిన సవ్యసాచి సినిమా వచ్చేనెల 2న థియేటర్లలోకి రాబోతోంది. సరిగ్గా ఈ సినిమా రిలీజైన 2 వారాలకు ఇదే బ్యానర్ నుంచి అమర్-అక్బర్-ఆంటోనీ సినిమాను విడుదలకు సిద్ధంచేశారు. ఈ కాలం ఓ సినిమా 2 వారాలు ఆడితే అదే పెద్ద విషయం. ఆ సమీకరణం ఆధారంగా ఈ ప్లాన్ వేశారా.. లేక సవ్యసాచి రిజల్ట్ పై అనుమానంతో షార్ట్ గ్యాప్ లోనే రవితేజ సినిమాను థియేటర్లలోకి తీసుకొస్తున్నారా అనేది డౌట్.

మొత్తమ్మీద ఒకే బ్యానర్ నుంచి ఇలా 2 వారాల గ్యాప్ లో 2 సినిమాలు రావడం అనేది ఇదే ఫస్ట్ టైం. దీన్ని కాస్త సాహసోపేత నిర్ణయంగా కూడా చెబుతున్నారు విశ్లేషకులు. ఇండస్ట్రీలో లక్కీ హ్యాండ్ గా పేరున్న మైత్రీ మూవీ మేకర్స్.. ఈసారి హిట్ కొడతారో, నష్టాలు చవిచూస్తారో నవంబర్ లో తేలిపోతుందన్నమాట.