వైసీపీ టికెట్ల కోసం టీడీపీ నేతల ప్రయత్నం!

వైఎస్సార్ కాంగ్రెస్ పార్టీ తరఫున రెండు ఎంపీ టికెట్ల విషయంలో తెలుగుదేశం పార్టీ నేతలు పోటీలో ఉన్నారని తెలుస్తోంది. ఈ విషయాన్ని తెలుగుదేశం వర్గాలే చెబుతున్నాయి. తెలుగుదేశం పార్టీలో ప్రస్తుతం వివిధ పదవుల్లో ఉన్న ఈ నేతలు వచ్చే ఎన్నికల నాటికి వైసీపీ తీర్థం పుచ్చుకుంటారని, ఈ మేరకు టికెట్లను సంపాదించుకునే ప్రయత్నంలో ఉన్నారని సమాచారం.

ఒకటి గుంటూరు ఎంపీ సీటు, రెండు హిందూపురం ఎంపీ సీటు…. ఈ రెండింటి విషయంలో తెలుగుదేశం పార్టీ లోని నేతలు వైసీపీ టికెట్ కోసం ప్రయత్నాలు సాగిస్తున్నారట.

గుంటూరు జిల్లాలో టీడీపీ ఎమ్మెల్యేగా ఉన్న ఒక నేత, అనంతపురం జిల్లాలో టీడీపీ తరఫున యాక్టివ్ గా ఉన్న ఇద్దరు నేతలు ఈ నియోజకవర్గాల వైసీపీ టికెట్ ల ను ఆశిస్తున్నారని సమాచారం.

వారి పేర్లు సులభంగానే అర్థం అవుతున్నాయి. గుంటూరు లో మోదుగుల వేణుగోపాల్ రెడ్డి అని స్పష్టం అవుతోంది. మోదుగుల వైసీపీలోకి చేరతాడు అనే అంచనాలు ఇప్పటివి కావు. గత ఎన్నికల ముందు కూడా మోదుగుల వైసీపీలో చేరతాడనే ప్రచారం జరిగింది. అయితే అది జరగలేదు. ఇప్పుడు మళ్లీ అలాంటి ప్రచారమే జరుగుతోంది.

అలాగే హిందూపురం ఎంపీ సీటు విషయంలో కూడా పోటీ ఉందని తెలుస్తోంది. తెలుగుదేశం పార్టీ తరఫున హిందూపురంలో బాలయ్య సెటిలయ్యాక మరొకరికి అవకాశం దక్కదని అర్థమయ్యాక కొందరు నేతలు వైసీపీ తరఫున హిందూపురం ఎంపీ టికెట్ దక్కుతుందేమో అని ఆశిస్తున్నట్టుగా ఉన్నారు. ఈ వ్యవహారాలు చర్చల దశలో ఉన్నాయని సమాచారం. అసలు కథ ముందు ముందు తెలిసే అవకాశం ఉంది.