ఏడ‌వ త‌ర‌గ‌తి పాస్ కాకుండానే... అమెరికా యూనివ‌ర్శిటీలో సీటు!

ప‌ది, ఇంట‌ర్‌…డిగ్రీ ఇలా సాంప్రదాయ బ‌ద్ధంగా చ‌దివితేనే చ‌దువు కాద‌ని, తెలివితేట‌లు సృజ‌నాత్మ‌క‌త ఉంటే ఇవ‌న్నీ లేకుండా కూడా అమెరికాలోని ప్ర‌తిష్టాత్మ‌క యూనివ‌ర్శిటీలో సీటు, స్కాల‌ర్‌షిప్‌ పొంద‌వచ్చ‌ని రుజువుచేసింది మాళ‌వికా రాజ్ జోషి. ముంబ‌యికి చెందిన ప‌దిహేడేళ్ల ఈ అమ్మాయికి ప‌ద‌వ త‌ర‌గ‌తి, ఇంట‌ర్ పూర్తి చేసిన‌ట్టుగా స‌ర్టిఫికెట్లు లేవు. ఎందుకంటే ఆమె ఆ ప‌రీక్ష‌లే రాయ‌లేదు. అయినా అమెరికాలోని ప్ర‌తిష్టాత్మ‌క మసాచుసెట్స్ ఇన్‌స్టిట్యూట్ ఆఫ్ టెక్నాల‌జీ (మిట్‌) నుండి స్కాల‌ర్‌షిప్‌ని పొందింది. ఇప్పుడు అక్క‌డ కంప్యూట‌ర్ సైన్స్‌లో డిగ్రి చేయ‌బోతోంది.

ఇదెలా సాధ్య‌మైందంటే …మాళ‌విక‌ ఇంట‌ర్నేష‌న‌ల్ ఒలింపియాడ్ ఆఫ్ ఇన్‌ఫ‌ర్‌మాటిక్స్ ప‌రీక్ష‌ల్లో రెండుసార్లు వెండి, ఒక‌సారి కాంస్య ప‌త‌కాల‌ను సాధించింది. ఇత‌ర విద్యార్హ‌త‌లు లేక‌పోయినా లెక్క‌లు, ఫిజిక్స్‌, కంప్యూట‌ర్… ఒలింపియాడ్ ప‌రీక్ష‌ల్లో మెడ‌ల్స్ సాధించిన‌ వారికి మిట్‌లో ప్ర‌వేశం దొరుకుతుంది. అలాగే మాళ‌విక‌కు కంప్యూట‌ర్ సైన్స్‌లో అడ్మిష‌న్ ల‌భించింది. ఇదంతా మాళ‌విక త‌ల్లివ‌ల‌న సాధ్య‌మైంది. మాళ‌విక త‌ల్లి సుప్రియ‌కు పిల్ల‌లు సంవ‌త్స‌రాల త‌ర‌బ‌డి క్లాసురూముల్లో చ‌ద‌వటం అంటే ఏమాత్రం ఇష్టం లేదు. వారు త‌మ‌కి న‌చ్చిన‌ స‌బ్జక్టునే చ‌ద‌వాల‌నేది సుప్రియ అభిప్రాయం. అందుకే నాలుగేళ్ల క్రితం ఏడో త‌ర‌గ‌తి చ‌దువుతున్న మాళ‌విక‌ని ఆమె స్కూలు మానిపించేశారు.

త‌రువాత అనేక స‌బ్జ‌క్టులపై అవ‌గాహ‌న పెంచుకున్న మాళ‌విక… త‌న‌కు కంప్యూట‌ర్ ప్రోగ్రామింగ్ అంటే ఇష్ట‌మ‌న్న సంగ‌తి గుర్తించింది. ఆ దిశ‌గానే సొంతంగా చ‌ద‌వ‌టం మొద‌లుపెట్టింది. ఒలింపియాడ్ మెడ‌ల్స్ సాధించింది. కానీ మ‌న‌దేశంలో ఎంత నాలెడ్జ్ ఉన్నా ఐఐటి లాంటి విద్యాసంస్థ‌ల్లో త‌గిన విద్యార్హ‌త లేకుండా ప్ర‌వేశం దొర‌క‌దు. చెన్నై మాథ‌మెటిక‌ల్ ఇన్‌స్టిట్యూట్‌లో మాత్రం ఆమెకు అడ్మిష‌న్ ల‌భించింది. అందులో ఆమె ఎమ్ఎస్‌సి స్థాయి కోర్సులో చేరింది. ఇక అమెరికా మిట్ స్కాల‌ర్‌షిప్ ..ఒలింపియాడ్ మెడ‌ల్స్ ఆధారంగా ల‌భించింది. సాధార‌ణ చ‌దువులో ఎలాంటి స‌ర్టిఫికెట్లు లేక‌పోయినా…ఆమె తెలివితేట‌ల స్థాయిని చూసి త‌మ నిబంధ‌న‌ల‌ను స‌డ‌లించి మాళ‌విక‌కు మిట్‌లో సీటు ఇచ్చార‌ని చెన్నై మాథ‌మెటిక‌ల్ ఇన్‌స్టిట్యూట్ నిర్వాహ‌కులు మాధ‌వ‌న్ ముకుంద్ అన్నారు.

మాళ‌వికకు ఈ అవ‌కాశం దక్క‌డంపై ఆమె త‌ల్లి అమితానందంగా ఉన్నారు. ముంబ‌యిలో దాద‌ర్ పార్సీ యూత్ అసెంబ్లీ స్కూల్లో ఏడో త‌ర‌గ‌తి చ‌దువుతుండ‌గానే సుప్రియ మాళ‌విక‌ని స్కూలు మానిపించేశారు. మాళ‌విక బాగానే చ‌దువుతుండేద‌ని, కానీ త‌న కూతుళ్లు (మాళ‌విక‌కు రాధ అనే చెల్లెలు ఉంది) చ‌దువు విష‌యంలో ఇంకా సంతోషంగా ఉండాల‌ని అనిపించింద‌ని సుప్రియ తెలిపారు. పిల్ల‌ల‌కు చ‌దువు ద్వారా సాధించే సాంప్ర‌దాయ నాలెడ్జి కంటే ఆనందం ముఖ్య‌మ‌ని ఆమె న‌మ్ముతున్నారు. అందుకే మాళ‌విక తండ్రి…ఇంజినీరింగ్ చ‌దివి బిజినెస్ చేస్తున్న రాజ్ …ఇందుకు ఒప్పుకోక‌పోయినా ఈ ప‌నిచేశానంటారామె.

సుప్రియ… క్యాన్స‌ర్ పేషంట్లను సంర‌క్షిస్తున్న ఒక ఎన్‌జిఓతో క‌లిసి ప‌నిచేస్తున్నారు. అక్క‌డ ఎనిమిది, తొమ్మిది చ‌దువుతున్న పిల్ల‌లు క్యాన్స‌ర్‌తో బాధ‌ప‌డ‌టం తాను చూసిన‌ట్టుగా….ఇది త‌న‌పై ప్ర‌భావం చూపింద‌ని…. పిల్ల‌ల‌కు చ‌దువులో ఆనందం మాత్ర‌మే ఉండాల‌ని తాను భావించాన‌ని సుప్రియ చెబుతున్నారు. అందుకే ఆమె తాను చేస్తున్న ఉద్యోగాన్ని వ‌దిలేసి మాళ‌విక చ‌దువుని డిజైప్ చేయ‌టం మొద‌లుపెట్టి…చివ‌రికి తాను అనుకున్న‌ది సాధించారు.