ఎన్టీఆర్ టైటిల్ కాపీ కొట్టిన మెగా హీరో

మెగా హీరోల్లో అల్లు శిరీష్ ఒక్కడే ప్రస్తుతం డౌన్ ఫాల్ లో ఉన్నాడు. ఎలాగైనా ఓ హిట్ కొట్టి రేసులోకి రావాలనుకుంటున్నాడు. అందుకే అన్ని మసాలాలు దట్టించి శ్రీరస్తు-శుభమస్తు అనే సినిమాను తెరకెక్కించాడు. పరశురాం దర్శకత్వంలో త్వరలోనే విడుదలకాబోతున్న ఈ సినిమాతో కచ్చితంగా హిట్ కొట్టాలని అనుకుంటున్నాడు శిరీష్. ఇదిలా ఉండగా… శ్రీరస్తు-శుభమస్తు సినిమాతో పాటు మరో మూవీని కూడా కంప్లీట్ చేసే పనిలో బిజీగా ఉన్నాడు. కొత్తకుర్రాడు వేణు మల్లాది దర్శకత్వంలో ఈ సినిమా షూటింగ్ కూడా సైమల్టేనియస్ గా నడుస్తోంది. అల్లు అరవింద్ నిర్మిస్తున్న ఈ సినిమాలో కృష్ణగాడి వీరప్రేమగాథ సినిమాతో మెప్పించిన మెహరీన్ హీరోయిన్ గా నటిస్తోంది. గతంలో ఎన్టీఆర్ నటించిన ఓ సినిమా టైటిల్ ను ఈ సినిమాకు ఫిక్స్ చేయాలని అనుకుంటున్నారు. సీనియర్ ఎన్టీఆర్ నటించిన సూపర్ హిట్ మూవీ “జగదేకవీరుని కథ” సినిమా ఇప్పటికీ చాలామందికి గుర్తే. అదే పేరును అల్లు శిరీష్ కొత్త సినిమాకు కూడా పెడదామని భావిస్తున్నారట. అయితే ఈ టైటిల్ పై ఇంకా చర్చలు జరుగుతున్నాయి. మరోవైపు శ్రీరస్తు-శుభమస్తు సినిమా ప్రమోషన్ లో శిరీష్ బిజీగా ఉన్నాడు. వచ్చే శుక్రవారం ఈ సినిమా విడుదలకాబోతోంది. ఆ తర్వాత… టైటిల్ పై ఓ నిర్ణయానికి వస్తారు.