ఆయ‌న దేవుళ్లకు... టైల‌ర్‌!

టైల‌రింగ్‌ ప‌నిచేసే ర‌మేష్ 35 సంవ‌త్స‌రాలుగా దేవుళ్ల‌కు బ‌ట్ట‌లు కుడుతున్నారు. గుజ‌రాత్ రాష్ట్రంలోని అహ్మ‌దాబాద్ జిల్లా వ్యాప్తంగా ఉన్న అనేక ఆల‌యాల్లో దేవతా మూర్తులకు ఆయ‌న కుట్టిన దుస్తులనే ధ‌రింప‌చేస్తున్నారు. ఈ సంవ‌త్స‌రం 65వ ఏట అడుగుపెడుతున్న ర‌మేష్‌, తాను ద‌ర్జీగా మార‌టం దైవ నిర్ణ‌య‌మ‌ని న‌మ్ముతున్నారు. మొద‌ట్లో 60 ఆల‌యాల‌కు ద‌ర్జీగా ప‌నిచేసిన ఆయ‌న‌, వ‌య‌సు పెరుగుతుండ‌టంతో ప‌నిని కాస్త త‌గ్గించుకుంటున్నారు. ఎం కాం చ‌దువుతున్న ర‌మేష్‌కి, చ‌దువు పూర్త‌యిన రోజుల్లో త‌న‌కు ఒక మంచి జాబ్ దొరుకుతుంద‌నే ఆశ ఉండేది. ఆయ‌న పీజీతో పాటు ఇన్‌కం ట్యాక్స్ లాంటి కొన్ని స‌బ్జ‌క్టుల్లో డిప్లొమాలు కూడా చేశారు. అయితే విధి త‌న‌కు ఇదే రాసిపెట్టిందంటారు ర‌మేష్‌.

తండ్రి ద‌ర్జీ ప‌నిచేస్తుండటంతో అందులో ప్రాథ‌మిక శిక్షణ తీసుకుని తాను కూడా టైల‌రింగ్ షాపుని న‌డ‌ప‌టం మొద‌లుపెట్టారు. ఈ క్ర‌మంలో త‌న షాపు ముందున్న న‌ట్వ‌ల్‌లాల్ ఆల‌యం నుండి ఆర్డ‌రు వ‌చ్చింది. అప్పుడు ర‌మేష్, దేవ‌తా మూర్తుల‌కు కుట్టిన దుస్తులు భ‌క్తుల‌ను బాగా ఆక‌ట్టుకున్నాయి. అప్ప‌టినుండి ఆయ‌న దేవుళ్ల టైల‌ర్‌గా ముద్ర‌ప‌డిపోయారు. అనేక గుళ్ల‌కు దుస్తుల అలంక‌ర‌ణ ద్వారా మంచి పేరు తెచ్చుకున్నారు.

దేవ‌తా మూర్తుల‌కు దుస్తులు డిజైన్ చేసేట‌పుడు ఆయా దేవ‌త‌ల ల‌క్ష‌ణాల‌ను దృష్టిలో పెట్టుకుంటాన‌ని ర‌మేష్ తెలిపారు. కృష్ణుడు శ‌క్తి మంతుడ‌ని, రాముడు ప్ర‌శాంత వ‌ద‌నుడ‌ని…ఇవ‌న్నీ త‌న దుస్తుల డిజైనింగ్‌లో ప్ర‌తిబింబించేలా, రంగులు, క్లాత్‌ల‌ను ఎంపిక చేస్తానంటున్నారు ఆయ‌న‌. ప్ర‌తి గుడీ… దేవ‌తా మూర్తుల దుస్తుల అలంక‌ర‌ణ విష‌యంలో త‌మదైన ప్ర‌త్యేక‌శైలిని క‌లిగి ఉంటుంద‌ని, అందుకు అనుగుణంగానే తాను ప‌నిచేస్తాన‌ని అన్నారు. మొద‌ట్లో దేవ‌తా మూర్తుల‌కు దుస్తులు స‌రిగ్గా అమ‌ర‌టం లేద‌నే ఫిర్యాదు ఆర్చ‌కుల నుండి వ‌చ్చిందన్నారు. ఆల‌యంలో మూర్తుల కొల‌త‌లు తీసుకునే అవ‌కాశం ఇవ్వ‌మ‌ని తాను కోరాన‌ని, అయితే గ‌ర్భ గుళ్ల‌లోకి పూజారులు బ్రాహ్మ‌ణేత‌రుల‌ను అనుమ‌తించ‌ర‌ని…అయితే తానుదేవ‌తా మూర్తుల కొల‌త‌లు తీసుకోగ‌లిగాన‌ని ర‌మేష్ చెప్పారు. ఆల‌య త‌లుపులు మూసి, ప్రార్థ‌న చేస్తూ…తాను కొల‌త‌లు తీసుకున్నాన‌ని, అప్ప‌టినుండి స‌రిగ్గా కుట్ట‌గ‌లుగుతున్నాన‌ని ఆయ‌న చెప్పారు.