తలసాని జుట్టు మీద పడ్డ రేవంత్

టీఆర్‌ఎస్ నేతల మీద ఆక్రోశాన్ని టీటీడీపీ వర్కింగ్ ప్రెసిడెంట్ రేవంత్ రెడ్డి మాటల తూటాల ద్వారా తీర్చుకుంటున్నారు. మంగళవారం కరీంనగర్ జిల్లాలో పర్యటించిన రేవంత్ అక్కడ మీడియాతో మాట్లాడుతూ మంత్రులు తలసాని శ్రీనివాస్ యాదవ్, ఈటెల రాజేందర్‌పై వ్యక్తిగత విమర్శలకు దిగారు.

దరిద్రమోడు బొచ్చెపట్టుకుని అడుక్కునేందుకు వెళ్తుంటే బొచ్చె మీద పిడుగు పడిచచ్చినట్టుగా ఈటెల రాజేందర్ పరిస్థితి ఉందని ఎద్దేవా చేశారు. మంత్రివర్గంలో అవమానాలు భరిస్తూ చచ్చిన శవంలా ఈటెల తయారయ్యారని విమర్శించారు. ఈటెల రాజేందర్ బతికున్నా తెలంగాణ సమాజానికి ఎలాంటి ఉపయోగం లేదని రేవంత్ వ్యాఖ్యానించారు.

మరో మంత్రి తలసానిపై కాస్త హద్దు మీరి రేవంత్ తీవ్ర వ్యాఖ్యలు చేశారు. నెత్తిన బొచ్చును కిరాయికి తెచ్చుకున్న వ్యక్తి తనను విమర్శించడం ఏమిటని రేవంత్ మండిపడ్డారు. అయనేమన్నారంటే ” నెత్తిన బొచ్చు లేక బొచ్చే కిరాయికి తెచ్చుకుని నెత్తిమీద పెట్టుకున్నోడు తలసాని. ఆయనకున్నది అసలు జుట్టు కాదు. నకిలీది తెచ్చి పెట్టుకున్నాడు. ఆయన పదవి కూడా నకిలీదే. సిగ్గులేకుండా విగ్గులు పెట్టుకుని వికారంగా మాట్లాడే వారి గురించి నేను మాట్లాడాల్సిన అవసరం కూడా లేదు” అని రేవంత్ సైటర్లు వేశారు.

తలసాని విగ్గులు పెట్టుకుని వికారంగానే మాట్లాడుతున్నారని విమర్శించడం బాగానే ఉంది. మరీ బాలయ్య బాబు విగ్గుపై రేవంత్ ఏం చెబుతారని టీఆర్‌ఎస్‌ నేతలు రివర్స్ పంచ్ వేస్తున్నారు.