బొత్సకు షాక్‌ ఇవ్వనున్న ఆయన సోదరుడు

విజయనగరం జిల్లాలో వైసీపీ మరో షాక్‌ తగలనున్నది. మాజీ మంత్రి, ఎమ్మెల్సీ బొత్స సత్యనారాయణ సోదరుడు లక్ష్మణరావు త్వరలో జనసేన కండువా కప్పుకోనున్నారు. వ్యాపారరంగంలో ఉన్న ఆయన ప్రత్యక్ష రాజకీయాల్లోకి రావాలని పదేళ్లుగా యత్నిస్తున్నారు. జిల్లాలో సామాజికంగా అనుకూలంగా ఉండి, ఏ స్థానం నుంచైనా పోటీ చేయాలని అనుకున్నా అవకాశం దక్కలేదు.

మొన్నటి అసెంబ్లీ ఎన్నికల్లో నెల్లిమర్ల నియోజకవర్గం నుంచి వైసీపీ అభ్యర్థిగా పోటీ చేసిన అప్పలనాయుడుకు వ్యతిరేకంగా పనిచేసినట్లు ఆ పార్టీ వర్గాల్లో ప్రచారం జరిగింది. తన అనుచరులుగా ఉన్న ఏడుగురు సర్పంచులను జనసేనలోకి పంపి, తద్వారా కూటమి విజయానికి పరోక్షంగా సహకారం అందించారని విమర్శలున్నాయి.. ఈ ఎన్నికల్లో వైసీపీ దారుణంగా ఓడిపోవడంతో ఆ పార్టీని వీడాలని ఆయన తాజాగా నిర్ణయించుకున్నారు. దసరా తర్వాత ముహూర్తం చూసుకుని జనసేన అధినేత పవన్‌ కల్యాణ్‌ సమక్షంలో పార్టీలో చేరనున్నారు.